ဓမ္မဥပဒေ ပြန့်ပွါးရေးအသင်းချုပ်၏ ရည်ရွက်ချက်နှင့် ဝေဖန်သူများသို့ဖြေရှင်းချက်

လောကဥပေဒ၊ ဓမ္မဥပဒေ ဟူ၍ ဥပဒေ နှစ်မျိုးရှိသည်။ 

လောကဥပဒေ-ဆိုသည်မှာ လောကသားတို့ လိုက်နာရန်အတွက် သက်ဆိုင်ရာက ချမှတ်ထားသော စည်းကမ်း၊ ဘောင်၊ ကလနား- များ ဖြစ်၍၊ ဓမ္မဥပဒေ ဆိုသည်မှာ ဘုရားသားတော်တို့ လိုက်နာရမည့် ဗုဒ္ဓကိုယ်တော်တိုင် မိန့်မြွက်တော်မူခဲ့သည့် စည်းကမ်းနည်းလမ်းများ ဖြစ်သည်။ 

ထို ဥပဒေ နှစ်မျိုးသည် များသောအားဖြင့် အနုရောဓ- လိုက်လျောညီထွေမှု့ရှိတတ်သော်လည်း တစ်ခါတစ်ရံ၌မူ ဝိရောဓိ ဆန့်ကျင်ဘက် သဘောမျိုး သက်ရောက်နေသည်လည်း ရှိတတ်ပါသည်။ ဥပမာ- သာသနာတော်၌ အဓမ္မဝါဒီ တဦးပေါ်ပေါက်လာခဲ့လျှင် ဓမ္မဥပဒေ က မျက်နှာမပြဝံ့အောင်၊ ခေါင်းမဖော်ဝံ့အောင် နာမည်တပ်၍ နှိပ်ကွပ်ခွင့် ရှိပါသည်။ သို့သော်- လောကဥပဒေ အရ အဓမ္မဝါဒီကို နာမည်တပ်၍ တိုက်ရိုက်သုံးစွဲခွင့် တိုက်ရိုက်နှိပ်ကွပ်ခွင့် မရှိပါ။ ထိုအခါမျိုး၌ ဘုရားသားတော်တို့ မျက်စိမိတ်၍ ရွေးချယ်ရတတ်ပါသည်။ ဓမ္မဥပဒေသဘောတရား တရားအရ ဥပမာဖြင့် ထင်စွာ ပြရလျှင် အဒိန္နာဒါန သိက္ခာပုဒ် အရ ပိုင်ရှင်မပေးသော သူတပါး၏ ဥစ္စာကို ခိုးယူသော သူသည် ခိုးယူဆဲခဏပင် ခိုးမူ့မြောက်၍ သိက္ခာပုဒ်ပျက်ဆီးက သူခိုးအဖြစ်သို့ ရောက်၏။ ထိုနည်းတူ ရဟန်းတော်တို့ စောင့်ထိန်းအပ်သော ဝိနည်းသိက္ခာပုဒ်တွင် ဒုတိယပါရာဇိက သိက္ခာပုဒ်အရ ရဟန်းတစ်ပါးသည် တစ်မတ်ထက် အဖိုးထိုက်တန်သော ပိုင်ရှင်မပေးသော သူတပါး၏ ဥစ္စာကို ခိုးယူမည်ဟူသော စိတ်အကြံအစည်ဖြင့် ခိုးမည့် အရာဝတ္ထု ပစ္စည်းကိုကိုင်လိုက်သော အခါ ထိုပစ္စည်း နေရာမှ လက်တစ်ဆစ်ခန့် ရွေ့သွားလျှင်ပင် ခိုးမူ့မြောက်၍ ဒုတိယပါရာဇိက သိက္ခာပုဒ် အရ ပါရာဇိက ကျကာ ရဟန်းဘဝပျက်ဆီး ဆုံးရှုံးရပါ၏။ အထက်ပါ အချက်လက်တို့ကို ကြည့်လျင် တခြားသူ တစုံတစ်ယောက် ဆုံးဖြတ်ချက်ချပေးမှာသာလျင် ထိုအပြစ်သည် သက်ရောက်သည် မဟုတ် ကာယရှင် ကိုယ်တိုင်က ခိုးမူ့ကျူးလွန်ဆဲ အခိုက်တန့်မှာပင် အပြစ်သက်ရောက်သည်မှာ ဓမ္မနည်းလမ်းကြောင်းအရ ကြည့်လျင် ထင်ရှားပါသည် ထိုနည်းတူစွာပင် ဓမ္မစေတီ ဥိးကောသလ္လ နှင့် အခြားသော အဓမ္မဝါဒီများအားနာမည်တပ်၍ အဓမ္မဝါဒီ ဟု ဆိုခြင်းသည် သက်ဆိုင်ရာမှ ဆုံးဖြတ်ချက်မချရသေးသော်လည်း သူတို့ ဟောသော တရားများကို သုံးသတ်၍ အဓမ္မဝါဒီ ဖြစ်သည်ဟု ဆုံးဖြတ်ချက် ချရပေမည်။ အခိုင်မာ ဖြစ်စေရန် အင်္ဂုတ္ထိုလ်လာ ဘုရားဟော တရားတော်များဖြင့် ထုတ်ပြရလျှင်

 “ယေတေ ဘိက္ခေ၀ ဘိက္ခူ အဓမ္မံ ဓမ္မောတိ ဒီပေန္တိ၊ တေ ဘိက္ခေ၀ ဘိက္ခူ ဗဟုဇန အဟိတာယ ပဋိပန္နာ ဗဟုဇန အသုခါယ ဗဟုနော ဇနဿ အနတ္တာယ အဟိတာယ ဒုက္ခာယ ဒေဝမနုဿာနံ။ ဗဟုဉ္ဖ တေ ဘိက္ခေ၀ ဘိက္ခူ အပုညံ အသဝန္တိ၊ တေစိမံ သဒ္ဓမံ အန္တရ ဒါပေန္တီ တိ။ (အင်္ဂုတ္ထိုလ်၊ ၁၊ ၁၈-၁၉) 

ရဟန်းတို့ အကြင်ရဟန်းတို့သည် တရားစစ်တရားမှန် မဟုတ်သော အဓမ္မကို တရားစစ်တရားမှန်ဖြစ်သော ဓမ္မဟုလည်းကောင်း၊ တရားစစ်တရားမှန် ဖြစ်သော ဓမ္မကို တရားစစ်တရားမှန်မဟုတ်သော အဓမ္မဟုလည်းကောင်း၊ ဝိနည်းစစ် ဝိနည်းမှန် မဟုတ်သော အဝိနယ ကို ဝိနည်းစစ် ဝိနည်းမှန်ဖြစ်သော ဝိနယ ဟုလည်းကောင်း၊ ဝိနည်းစစ် ဝိနည်းမှန် ဖြစ်သော ဝိနယ ကို ဝိနည်းစစ် ဝိနည်းမှနမဟုတ်သော အဝိနယ ဟုလည်းကောင်း၊ မြတ်စွာဘုရား ဟောအပ် ပြောအပ်သည်ကို မြတ်စွာဘုရား မဟောအပ် မပြောအပ်ဟု လည်းကောင်း၊ မြတ်စွာဘုရား မဟောအပ် မပြောအပ်သည်ကို မြတ်စွာဘုရား ဟောအပ် ပြောအပ်ဟု လည်းကောင်း၊ မြတ်စွာဘုရား အလေ့အကျင့် မပြုအပ်သည်ကို မြတ်စွာဘုရား အလေ့အကျင့် ပြုအပ်၏ ဟုလည်းကောင်း၊ မြတ်စွာဘုရား အလေ့အကျင့် ပြုအပ်သည်ကို မြတ်စွာဘုရား အလေ့အကျင့် မပြုအပ် ဟုလည်းကောင်း၊ မြတ်စွာဘုရား မပညတ်အပ်သည်ကို မြတ်စွာဘုရား ပညတ်အပ်၏ ဟုလည်းကောင်း၊ မြတ်စွာဘုရား ပညတ်အပ်သည်ကို မြတ်စွာဘုရား မပညတ်အပ် ဟုလည်းကောင်း ပြုကြကုန်၏ ရဟန်းတို့ ထိုရဟန်းတို့သည် လူအများစီးပွါးချမ်းသာမဲ့ခြင်း၊ အကျိုးမဲ့ခြင်း၊ နတ်လူတို့ အစီးပွါးမဲ့ခြင်း၊ ဆင်ရဲခြင်းငှါကျင့်သည် မည်ကုန်၏။ ရဟန်းတို့ ထိုရဟန်းတို့သည် များစွာသော အကုသိုလ်ကို ဖြစ်ပွါးစေသည် မည်ကုန်၏ ဟု ဟောတော်မူအပ်ပါသည်။ တရားစစ်တရားမှန် မဟုတ်သော အဓမ္မကို တရားစစ်တရားမှန်ဖြစ်သော ဓမ္မဟုလည်းကောင်း၊ တရားစစ်တရားမှန် ဖြစ်သော ဓမ္မကို တရားစစ်တရားမှန်မဟုတ်သော အဓမ္မဟုလည်းကောင်း၊ မြတ်စွာဘုရား ဟောအပ် ပြောအပ်သည်ကို မြတ်စွာဘုရား မဟောအပ် မပြောအပ်ဟု လည်းကောင်း၊ မြတ်စွာဘုရား မဟောအပ် မပြောအပ်သည်ကို မြတ်စွာဘုရား ဟောအပ် ပြောအပ်ဟူသော အချက်များ အရ ယခု ဓမ္မစေတီ ဦးကောသလ္လ နှင့် အခြားသော အဓမ္မဝါဒီ အဖွဲ့များ ဟောပြောနေသော တရားများသည် အဓမ္မ ကို ဓမ္မ ဟုပြခြင်းစသည်ဖြင့် လူအများစီးပွါးချမ်းသာမဲ့ခြင်း၊ အကျိုးမဲ့ခြင်း၊ နတ်လူတို့ အစီးပွါးမဲ့ခြင်း၊ ဆင်းရဲခြင်းငှါ ဟောပြောနေ၍ များစွာသော အကုသိုလ်တို့ကို ဖြစ်ပွါးစေကာသာသာနာတော်ကြီး ကွယ်ပျောက်အောင် ပြုလုပ်နေသည်မှာ ဆိုအပ်ခဲ့ပြီးသော အထောက်ထားများဖြင့်ထင်ရှားနေပါသည်။ 

နိုင်ငံတော်သီးခြားဝိနည်းဓိုရ်အဖွဲ့က အဓမ္မဝါဒ အဖြစ်ဆုံးဖြတ်ပြီးသော ဆူးလေဦးမြင့်သိန်း ၏ အဓမ္မတရား ဘုရားဟောမဟုတ်သော မဟုတ်မမှန်တရားများကို ဓမ္မစေတီ ဦးကောသလ္လ က ပြန်လည်ဟောပြောနေခြင်းမှာ ညွန်ကြားလွာ အမှတ် ၅၀ နှင့် ၉၄ အထောက်များအရ ခိုင်မာသော သက်သေဖြစ်တယ်ဆိုတာလည်း ထင်ရှားပါသည်။ ထို့ပြင် အဓမ္မဝါဒ အဖြစ်ဆုံးဖြတ်ပြီးသော စာအုပ်စာတန်းများကို မိတ္ထူကူး၍ ဖြန့်ချီနေသည်မှာလည်း ကြားသိတွေ့မြင်နေရ၏။ သံဃာ့အဖွဲ့အစည်း အခြေခံစည်းမျဉ်း အတိုင်း ထုတ်ဖော်ပြရအုံးမည် ဆိုလျှင် စာမျက်နှာ (၂၀) အခန်း (၁)၊ အပိုဒ် (၂)၊ အပိုဒ်ခွဲ (က) ၌ “သာသာနာ ဆိုသည်မှာ ဗုဒ္ဓမြတ်စွာဘုရား၏ အဆုံးမတော်ကို ဆိုသည်” ဟု လည်းကောင်း၊ အပိုဒ်ခွဲ (င) ၌ “ထေရဝါဒ ဆိုသည်မှာ ပထမသင်္ဂါယနာမှ ဆဌသင်္ဂါယနာ အထိ သင်္ဂါယနာခြောက်တန် တင်ထားသော ပါဠိတော်၊ အဌကထာ၊ ဋီကာ အစရှိသော ပိဋကတ်ကို ဆိုလိုသည်” ဟု လည်းကောင်း အခြေခံစည်းမျဉ်း အခန်း (၂)၊ အပိုဒ် (၁၂)၊ အပိုဒ်ခွဲ (ဂ) ၌ ပရိယတ္တိသာသနာတော်ကို တိုးတက်စည်ပင် ပြန့်ပွါးစေရန်နှင့် ပိဋကတ်တော်နှင့် မညီသော ရေးသေားခြင်း၊ ဟောပြောခြင်း၊ ပြသခြင်း၊ ပြုလုပ်ခြင်းများကို တားဆီးကာကွယ်ရန် ဖြစ်သည်ဟုလည်းကောင်း ပြဆိုထားပါသည်။ ဤ ပြဆိုချက်များအရ မြတ်စွာဘုရား၏ အဆုံးမသာသနာတော်ဖြစ်သော ပထမသင်္ဂါယနာ မှ ဆဌသင်္ဂါယနာ အထိ သင်္ဂါယနာခြောက်တန် တင်ထားသော ထေရဝါဒ ပါဠိတော်၊ အဌကထာ၊ ဋီကာ အစရှိသော ပိဋကတ်တော်နှင့် မညီသော ရေးသားခြင်း၊ ဟောပြောခြင်း၊ ပြသခြင်း၊ ပြုလုပ်ခြင်းများကို အရေးယူ တားဆီးကာကွယ်နိုင်သည် ဟု ပါရှိပါသည်။ ထို့ကြောင့် မသိနားမလည်ကုန်သော ဗုဒ္ဓဘာသာဝင်များအား မဟုတ်မမှန်တရားများကို လိင်လည်လုပ်ကြံ၍ဟောပြောနေသော ဓမ္မစေတီ ဦးကောသလ္လ ဆူနာမီ ဦးဥတ္တမသာရ၊ ကျော်ဟိန်း၊ ချစ်ငယ်၊ ဦးအေးမောင်၊ ပါရဂူ စသော ပုဂ္ဂိုလ်များကို အဓမ္မဝါဒ အဖြင့် သက်ဆိုင်ရာမှ ဆုံးဖြတ်ချက် မချသေးသော်လည်း အဓမ္မဝါ ဖြစ်သည် ဟု ဓမ္မဥပဒေ ပြန့်ပွါးရေး အသင်းချုပ်မှ အခိုင်အမာ ဆိုခဲ့ပေသည်။ ဆက်၍ ဆိုဦးအံ့......... သာသနာတော်၌ အဓမ္မဝါဒ အဝိနယဝါဒီများ ပေါ်ပေါက်လာခဲ့ပြီ ဆိုလျှင် အနုနည်းနှင့် ဖြေရှင်းရသည်လည်းရှိသည်၊ အကြမ်းနည်းဖြင့် ဖြေရှင်းရသည်လည်း ရှိသည်၊ တစ်ပါးတည်း ဖြေရှင်းရသည်လည်း ရှိသည်၊ အုပ်စုဖွဲ့၍ အင်းအားသုံးပြီး ဖြေရှင်းရသည်လည်း ရှိသည်။ ဤ ဓမ္မဥပဒေ ပြန့်ပွါးရေး အသင်းချုပ် သည် သာသနာတော်၌ ပေါ်ပေါက်လာသော အဓမ္မဝါဒ အဝိနယဝါဒီများကို ဖြေရှင်းနိုင်ရန်အတွက် ဖွဲ့စည်း တည်ထောင်ခဲ့ခြင်း ဖြစ်ပေ၏။ အခါတစ်ပါး၌ မြတ်စွာဘုရားသည် သံဃာ့ပရိသတ်နှင့် တကွ ဥပုသ်ပြုရန် ဥပုသ်အိမ်ထဲ၌ သီတင်းသုံးတော်မူလျက်ရှိပါသည်။ ထိုအခါ သံဃာ့ပရိသတ်ထဲတွင် ဒုဿီလ-သီလမဲ့ ရဟန်းတပါးပါဝင်နေ၍ မြတ်စွာဘုရားက ဥပုသ်ပြုတော်မမူဘဲ ထိုင်လျက်သာ သီတင်းသုံးတော်မူပါသည်။ ဤသို့ ညဉ့်သုံးယာမ်ပတ်လုံး ကုန်ဆုံးသွားသည့် အခါ အရှင်မောဂ္ဂလာန်က အဘိညာဉ် တန်ခိုးဖြင့် ကြည့်တော်မူသော အခါ ဒုဿီလရဟန်းတပါးကို တွေ့မြင်၍ သုံးကြိမ်တိုင် အပြင်ထွက်ဖို့ တောင်းပန်ရှာပါသည်။ သုံးကြိမ်တောင်းပန်လျက် မရသော အခါ အရှင်မောဂ္ဂလာန်သည် ဒုဿီလပုဂ္ဂိုလ်ကို လက်မောင်ကိုကိုင်၍ အပြင်သို့ ဆွဲထုတ်ခဲ့ပေသည်။ (ဥပေါသထသုတ်၊ အံ၊ ၃၊ ၄၄/၅) ဤဝတ္ထုကို ထောက်လျှင် သာသနာတော်၏ ခလုတ်ဆူးညောင့်များ အင်အားမကောင်းပါက တစ်ပါးတည်းဖြင့် သုတ်သင် ရှင်းလင်းသည့် အစဉ်လာရှိခဲ့သည်ကို တွေ့မြင်ရပေမည်။  သို့တည်းမဟုတ် သာသနာ့ရန်ဆူးရန်ငြောင့်ကို အုပ်စုဖွဲ့၍ မိုက်တွင်းနက်နေပါလျှင် အင်အားသုံး၍ ချေမှုန်းရန် ဘဘုရားရှင်ကိုယ်တော်တိုင် ခွင့်ပြုခဲ့သည်ကို တွေ့ရှိရပေသည်။ အခါတစ်ပါး၌ ကီဋာဂီရိဂိုဏ်းသာ ရဟန်းများသည် ကုလဒူသကအနေသန မျိုးစုံဖြင့် သာသနာကို ဖျက်စီးလျက်ရှိရာ မြတ်စွာဘုရားက အရှင်သာရိပုတြာနှင့် အရှင်မောဂ္ဂလာန် တို့ကိုခေါ်၍ “ချစ်သားတို့၊ ကီဋာဂီရိဇနပုဒ်ကို သွားကြ၊ သာသနာ့ရန်ဆူးရန်ငြောင့်တို့ကိုမောင်းထုတ်ကြ” ဟု စေခိုင်းတော် မူပါသည်။ ထိုအခါ အရှင်သာရိပုတြာက “စဏ္ဍာ တေ ဘိက္ခူ ဖရုသာ- မြတ်စွာဘုရား၊ အဲဒီရဟန်းတွေဟာ ခက်ထန်ကြမ်းကြုတ်လှပါတယ်ဘုရား၊ ဘယ်လိုပုံမျိုးဖြင့် နှင်ထုတ်ရပါမလဲ ဘုရား” ဟု လျှောက်တော်မူပါသည်။ ထိုအခါ မြတ်စွာဘုရားက “တေန ဟိ တုမှေ သာရိပုတြာ ဗဟုကေဟိ ဘိက္ခူဟိ သဒ္ဓိ ံ ဂစ္ဆထ- ဒါဆိုရင် ရဟန်းများစွာ ခေါ်သွား အင်အားသုံးပြီး နှင်ထုတ်ကြ” ဟု နည်းပေးခွင့်ပြုတော်မူခဲ့ပါသည်။ အဂ္ဂသာဝက နှစ်ပါးလည်း ရဟန်းများစွာ ခေါ်သွားကာ သာသနာ့ရန်ဆူးရန်ငြောင့်တို့ကို အပြီးတိုင် ခုတ်ထွင်ရှင်းလင်း သုတ်သင်တော်မူခဲ့ပေသည်။ ဤဝတ္ထုကို သာဓက ပြုလျှင် အဓမ္မဝါဒီတို့ အားကောင်းပါက အင်အားသုံး၍ ချေမှုန်းသည့် အစဉ်လာသည် မြတ်စွာဘုရားလက်ထက်ကတည်းက ရှိခဲ့သည်ဆိုတာကို သဘောပေါက်ရပေမည်။ ဆက်၍ ဆိုဦအံ့ မြတ်စွာဘုရား၏ သာသနာတော်မည်သည်ကား ခိုင်ခံ့သော ဥပဒေဖြင့် တည်ဆောက်ထားသည့် ဓမ္မဝိနယ နိုင်ငံတော်ဖြစ်သည်။ သို့ဖြစ်၍ ခရီးသွားဟန်လွဲသဘောမျိုးဖြင့် သွားရင်းလာရင်း သင့်ရောက်လေ့ရှိသော အပြစ်များဆိုလျှင် တစ်ပါးနှင့်တပါး အပြန်အလှန် တောင်းပန်ခြင်းဖြင့် ကုစားရသည်။ ထို့ထက်ကြီးမားသော ပြစ်မှု့ကို ကျူးလွန်မိလျှင် သံဃာတော်များ ခွင့်လွတ်နိုင် သည်အထိ ပရိဝါသ်ဆောက်တည်ပြီး ကုစားရသည်။ အကြီးမားဆုံး ဥပဒေကို မျက်ကွယ်ပြုလာလျှင်မူကား လူဝတ်လဲတန် လဲ၍လည်းကောင်း၊ လူချွတ်တန် ချွတ်၍လည်းကောင်း အပြစ်ပေး နှိပ်ကွပ်ရပေသည်။ ဤကား ဝိနည်းဥပဒေကို ချိုးဖောက်လာပါက နှိပ်ကွပ်ပုံ နှိပ်ကွပ်နည်းကို ပြဆိုခြင်း ဖြစ်ပါ၏။ ဓမ္မဥပဒေကို ချိုးဖောက်လာပါက ရောက်ရာအရပ်၊ ကြားရာအရပ်မှ မရပ်မနားပဲ အပြေးသွား၍ ဆုံးမရသည်။ ဆုံးမမရက နှိပ်ကွပ်ရသည်။ အရှက်ရအောင် မျက်နှာမဖော်နိုင်အောင် ခေါင်းမထောင်နိုင်အောင် ဝိုင်းဝန်းနှိမ်နှင်းရသည်။ နောင်အခါ ဤကဲ့သို့ အဓမ္မဝါဒီများ မပေါ်ပေါက်ရအောင် ချက်ခြင်းလက်ငင်း ဦးချိုးနှိပ်ကွပ်ရသည်။ မြတ်စွာဘုရားသည် ဥပဒေဖြင့် တည်ဆောက်ထားသော ဓမ္မနိုင်ငံတော်၌ ဓမ္မဥပဒေ ကို ချိုးဖောက်သူကို တွေ့ရှိလာလျှင် ကိုယ်တော်တိုင်နှိပ်ကွပ်ရုံသာမက သူ၏ သာဝကများ ကိုလည်း နှိပ်ကွပ်စေခဲ့သည်။ ယုတ်စွအဆုံး အနာထပိဏ်သူဌေးကြီးက တိတ္ထိဂိုဏ်းဆရာ ကြီးများနှင့် တရားဆွေးနွေးရင်း တိတ္ထိဂိုဏ်းဆရာကြီးများ မဖြေနိုင်အောင် ပြဿနာများ မေး၍ နှိပ်ကွပ်သည်ကိုပင် ဝမ်းမြောက်ဝမ်းသာ သာဓုခေါ်တော်မူခဲ့ပေသည်။ ထို့ကြောင့် အသင်းနှင့် ပတ်သက်၍ ဝေဖန်သူများသို့ ပြောကြားလိုပါသည်။ လောကဥပဒေကိုသာ နားလည်ပြီး ဓမ္မဥပဒေကို နားမလည်ဘဲ ဆရာကြီးလေသံမျိုးဖြင့် အရှက်မရှိ စီဘောက်မှာ လာရောက်ပြောဆိုမနေပါနဲ့ ဝေဖန်နိုင်စွမ်းရှိလျှင် ပို့စ်ရဲ့ အောက်မှာ နာမည်တပ်၍ တရားဝင်ဆွေးနွေးနိုင်သည်။ တခုတော့ သိထားရပေမည် လောက ဘက်မှ ရပ်တည်၍ ဓမ္မကို မျက်ကွယ်ပြုသူများ မဖြစ်ဖို့ အရေးကြိးပေသည်။ လောက ဘက်မှ ရပ်တည်၍ ဓမ္မကို မျက်ကွယ်ပြုသူများဆိုသည်မှာ အရှက်မရှိသူ၊ သိက္ခာမဲ့သူ၊ အတ္တဆန်သူ၊ ဓမ္မကို တန်ဖိုးမထားသူ၊ တစ်ဘ၀ တစ်နပ်စာကိုသာ မက်မောသူ၊ မျိုးမစစ်သူ၊ အများမျက်နှာသာကြည့်၍ ဘုရားမျက်နှာ မကြည့်သူများကို ဆိုလိုပါသည်။ ကျမ်းကိုး ကျမ်းကားနှင့် အထောက်ထားပြကာ လက်ခံနိုင်အောင် ဆွေးနွေးမယ်ဆိုရင် အချိန်မရွေး ဖိတ်ခေါ်သည်။ ဤ ဓမ္မဥပဒေ ပြန်ပွါးရေး အသင်းချုပ် သည် မြတ်ဗုဒ္ဓ သာဓုခေါ်မည့် အလုပ်မျိုးကို လုပ်နေမည့် ဘုရားရှင်၏ တပည့်သား သံဃာများ နှင့် ဥပသကာ များဖြစ်၏။ မြတ်စွာဘုရားသက်တော်ထင်ရှား ရှိစဉ်က ဓမ္မစေတီ ဦးကောသလ္လ ဆူနာမီ စသည်တို့ကဲ့ အဓမ္မဝါဒီမျိုးများ ပေါပေါက်ခဲ့ဘူးပေသည်။ ထိုကဲ့သို့ အဓမ္မဝါဒီမျိုးပေါ်ပေါက်လာလျှင် မြတ်စွာဘုရားကိုယ်တော်တိုင် ခေါင်းမဖော်နိုင်အောင် မျက်နှာမပြဝံ့လောက်အောင်၊ အရှက်ရအောင် နှိပ်ကွပ်တော်မူခဲ့ပေသည်။ ကေဝဋ္ဋ၏သား သာတိရဟန်းကို ဤနည်းဖြင့် နှိပ်ကွပ်ပြလိုက်ခြင်းမှာ “ချစ်သားတို့၊ အနာဂတ် သာသနာ၌ ဒီလို မိစ္ဆာကောင်တွေ ပေါ်ပေါက်လာလျှင် ဒီလို ပြောင်ပြောင်တင်းတင်း နှိမ်နှင်းကြ” ဟု လမ်းဖွင့်ပေးခဲ့ခြင်းပင် ဖြစ်၏။ မိစ္ဆာဝါဒီ နောက်လိုက် လက်ပါးစေတပည့်များသို့ အတိအလင်း ကျေညာလိုက်မည် ပြောင်ပြောင်တင်းတင်း နာမည်တပ်၍ အရေးမခံချင်လျှင် မြတ်စွာဘုရား သာသနာကို ပြောင်ပြောင်တင်းတင်း မစော်ကားကြနဲ့....................... 

အရှင်ဝရသာမိ 

ဓမ္မဥပဒေ ပြန့်ပွါးရေး အသင်းချုပ်